យើងទិញផ្លែស្វាយពីកសិករតាមគុណភាព និងដំណាក់កាលនៃផ្លែ។ ប្រសិនបើផ្លែមានសំបកល្អខ្លាំង នៅដំណាក់កាលផ្លែតូច យើងចុះកិច្ចសន្យាជាមួយកសិករក្នុងការវេចខ្ចប់ដើម្បីបានផ្លែស្វាយពណ៌លឿងមាស ហើយនាំចេញផ្លែស្វាយទុំស្រស់សម្រាប់ការប្រើប្រាស់។ ប្រសិនបើមានភ្លៀងខ្លាំងពេក វាប៉ះពាល់ដល់សំបកផ្លែស្វាយ យើងមិនវេចខ្ចប់ផ្លែស្វាយនោះទេ ដោយរក្សាទុកជាផ្លែស្វាយពណ៌បៃតង។ ស្វាយពណ៌បៃតងចំណាត់ថ្នាក់ទីមួយសម្រាប់ការទទួលទានផ្អែមស្រួយ ខណៈផ្លែស្វាយចំណាត់ថ្នាក់បន្ទាប់សម្រាប់កែច្នៃតាមរោងចក្រ។ យើងចុះកិច្ចសន្យាជាមួយកសិករសម្រាប់ការគាំទ្របច្ចេកទេស នឹងការណែនាំអំពីស្តង់ដារផលិតកម្ម បន្ទាប់មកការចរចាទិញផ្លែស្វាយពីកសិករមកវិញមុនពេលប្រមូលផល។ យើងបណ្តុះបណ្តាល និងផ្ដល់ជំនួយបច្ចេកទេសដល់កសិករ គឺចាប់ពីការតាក់តែងមែក ពូនគល់ រហូតដល់ប្រមូលផល និងនៅចុងបញ្ចប់ដំណោះស្រាយទីផ្សារ។
ផ្នែកបច្ចេកទេស យើងសហការជាមួយក្រសួងកសិកម្ម សម្រាប់ការបណ្តុះបណ្តាលគាំទ្រដល់កសិករ និងការចុះឈ្មោះកសិករដើម្បីទទួលបានវិញ្ញាបនបត្រ ការអនុវត្ដន៍កសិកម្មល្អ Cam GAP ។ យើងក៏ធ្វើកិច្ចសហប្រតិបត្តិការជាមួយកម្មវិធីអភិវឌ្ឍន៍នានាដូចជា USAID និង Swiss Contact ដើម្បីគាំទ្រកសិករជាមួយនឹងបច្ចេកទេសផលិតកម្មតាមស្តង់ដារ និងទីផ្សារ។ យើងបើកវគ្គបណ្តុះបណ្តាលស្តីពីការផលិតស្វាយខុសរដូវដល់កសិករ នៅតាមតំបន់ផលិតស្វាយសំខាន់ៗទាំងអស់។ បន្ទាប់ពីវគ្គបណ្ដុះបណ្ដាល ក្រុមការងារបច្ចេកទេសរបស់យើងបានចុះទៅពិនិត្យដល់ចម្ការ ដើម្បីបណ្ដុះបណ្ដាលនិងផ្ដល់ជំនួយបច្ចេកទេសបន្ថែមដល់កសិករ។ ដំណាក់កាលសំខាន់ៗមួយចំនួន រួមមានៈ ការតាក់តែងមែក ពូនគល់ ការដាក់ជី ការបញ្ចេញផ្កាតាមរដូវ ការកំចាត់សត្វល្អិត និងជំងឺ និងការថែទាំផ្កា និងផ្លែ។ល។
